ZUSTUPF 2010
Äs härzlichs Willkommä ä allnä da innä
Miär düänd üch da nu dr Zuästupf bringä
Diä Jährli gönd halt scho schnäll verbii
Vor 110 Jahr isch nämli di erscht Sännächilbi gsi
Uf d'Alp gönd au hüt nu gärä Jung und Alt
Dass äs det schön isch wüssid diä halt
Äs isch aber nüd eister ä Zucker-Schläck
Mängisch hurät mä det au im gröschtä Dräck
Nachum wärchä gids aber eister äs feins Z'abig
Und d'Famili cha au binänand si vom Morgät bis am Abig
Stolz chönid miär si uf üses Vaterland
Und vor allem uf üsä herrlich Burästand
Mälchä, Chäsä und Nidlä schwingä
Zwüschät durä nu eis juuzä und singä
Das isch ds schönscht am Älpler si
Äso vergad d'Zyt uf dr Alp viil z'gli
Hüt hed mä für's Gruäbä schiär nümmä dr Wiil
Will mä Arbät hed viel z'viil
Derbi muäss mä gar nüd äso wiit ga
Dass mä äs ruähigs und schöns Plätzli für sich cha ha
Ds gröscht Gschänk isch äs gsunds Läbä
Das chusch aber nüd über vergäbä
Dass mä chrank wird isch ä käs Wunder
Wämä afig nur nu schlückt der chemisch Plunder
D' Schweinegrippä hed grad ächli gä z'redä
Gha hed si nu gli schiär jedwedä
Jetzt isch das zum Glück aber wider verbii
Hoffentlich gids nüd grad wider ä nüüi Pandemie
D’ Pharmaindustrie hed am meischtä z'verdiänä gha
Au wänn sich glich nüd all hend wellä impfä la
Au d’Mediä hend grad ächli mögä brichtä
Schlussändlich hed mä uf d'Impfig glich chönnä verzichtä
Nüd nur d’Lüüt hends wellä la impfä la
Au bim Veh fönds afig mit derä Modä a
Sicher chamä sich aber nüd si
Öps ohni Blauzungä-Impfig schläuer wär gsi
Übärä Milchpriis isch mä sich eister nu nüd einig
Und dr Buur fragt mä au nüd gross über si Meinig
Apä drückids dr Priis liäber nu meh
Bis mä gli kä rotä Rappä meh cha gseh
Ab sofort muäss kä Buur me chäsä ällei
I d'Pragelchäsäri cha jedä si Milch bringä vo dähei
Muotithaler-Chäs duäd sich das Produkt nännä
A der fein Gschmack chamä sich sauft gwännä
Lang hend miär uf ä nüüi Chiläbrügg müässä wartä
Jetzt isch dr Buu ändlich gratä
Gsi isch diä Brügg villicht ächli tür
Si heig dä aber au di nächschtä 100 Jahr anä derfür
Verbotä wordä isch dr Buu vo Minarett
Was wettid ächt miär Buurä mit denä Türm dett
Gnuäg tolerant sind miär Schwiizer scho
Susch wettid nüd äso viil zu üs is Land innä cho
Uf Schwyz isch cho dr Russisch Presidänt
gmerkt hend miär ihn im Thal aber sehr dezänt
D'Sicherheit isch gsi am sälbä Tag zimli höch
Dass ihm dä ja niämer chund öppä z'nöch
Ä nüüä Presidänt hends gwählt dänä idä Staatä
Lang hed mä uf ä Schwarzä muässä wartä
Dr Obama isch uf dr Wält jetzt dr mächtigscht Maa
Bis jetzt hed nu nüd mängä öppis gägnä z'murä gha
Gä heds au diä Finanzkrisä
Da hends mäni adä lätzä Bankä öppis gä z'überwisä
Under d’Matratzä hättids gschider ta dr Looh
Äso wärs ja viil billiger cho
Graad usä redä hed ihm im Bundesrat nüd gnützt
Si hend ihn glich dr susä gstützt
Uf der Maa müänds jetzt halt verzichtä
Si meinid si chönids äso viil eh richtä
Üsä Kanton hed glaubi käs Gäld meh uf dr Bank
Susch hättid miär scho lang ä sichärä Horärank
Das Gäld isch halt nüd reserviärt für ä söllig Fäll
Und scho gar nüd für äs nüüs Turnäll
Ä huffä Lüüt sind umä g'sprungä im Thal
Das isch d'Swiss'O'Week gsi, im Fahl
Diä hend ä Chartä gha derbi
Dass dä nüd am Ziil sind gschossä verbii
Früähner hends das Problem nu nüd gha
Wo nu käni Auto umä gfahrä sind da
Doch jetzt muäss mä bis zwölfi si im Kindersitz
Und das isch dä nüd öppä ä Witz
Passiärt sind da ä huffä Sachä
Äs isch gwüssig nüd alles gsi zum Lachä
Wämä aber mitänand wott us cho voll und ganz
Bruchts vo jedum ächli Toleranz
So, jetzt hend miär glaubi alles gseid wo miär hend wellä
Jetzt chönid iähr nu öppis anänand verzellä
Dankä wend miär a allnä wo zu üs gfundä hend dr Wäg
Und miär hoffid iähr blibid all Gsund und Zwäg
