Zustupf 2024
1. Liebi Lüt, isch gliich wohär ier sind oder wen ier au tüend heissä
vo Härzä wemmer üch im Tal willkommä heissä.
Mier wend mid üch diä Sännächilbi fiirä und‘s au gmüetlich ha
und dä nachär au no lang nüd heizuä gah
2. Dr Plakettäverkauf a dr letstä Sännächilbi isch au cho is Stockä
Will dr Umzug duä nüd hed chönnä ums Wasser umä bockä
Us Nachhaltigkeitsgründä tüämmer diä Plakettä hütt verkaufä
Ich hoffä iär Bsuächer chönnid das verstah, und dägid üs nüd ohni Plakettä dr vo laufä
3. Äs gid Lüt diä wend gärä über diä urchigä Muotitaler lachä
aber mier sind nüd öpä hinderem Mond und sind au zha für modärni Sachä
Drum hedmä churzerhand ä Pumptrack chönnä realisierä
und äso cha jedä mid Velo oder Kiki sich im schanznä ga probierä
4. Au bim puurä und bim sännä gahd hüt viläs digital
ä ganzi Schwetti Mail und Nachrichtä chömid inä vo überal
Wotsch öpis wüssä oder ä Info durägäh
tuesch grad schnäll äs Whatsapp duräplodärä
5. Hüt gits ja immer wieder nüi Ässgwohnheitä
diä tüend sich mängisch grad ächli schnäll verbreitä
Eiwiessspänder vodr Zuekunft sig äs chliises Würmli midärä feinä Chruschtä
aber ich kännä nämä niemert, wos äso ghörig täti gluschtä
6. Ab um Nüjahr isch es jetzt obligatorisch mit der Schleppschluchsach
Gülle wird jetzt nüstens usbrungä ganz flach
Stinkä sötts dä weniger a allnä Ortä
Das hedmä dä Lüttä chönnä bi bringä mit viel versprächändä Wortä
7. Nümmä mängä Puur wot hüt me Sägäsä wetzä
viel meh rückä mueses, das tüend diä hüttigä Jungä schetzä
Äso isch au letscht Summer we am Schnüerli gangä
bis diä Balläprässi do Füür hed gfangä
8. Nüi Gädä wärdid buä, scho glii hed etz dä jedä einä
dr Wohlstand sig usbrochä, chönt mä scho schier meinä
Viel meh z‘Tierwohl und nüi Vorschriftä sind dr Grund
wo immer wieder frisch chömid vo üsem Bund
9. Dr nüü Bundesrat wot ä hertärä Kurs gägä Wolf la fahrä
är gsehd nüd nur Schöns i dem Tier, sondern au viel Gfahrä
So gänd diä präventivä Abschüss grad schön ztuä
drum ghört etz halt zu Rösti eifach Wolf derzuä
10. Bidä letschtä Wahlä für is Parlamänt
hend sich ä huufä Vorig zur Wahl gstellt und Redä ghaltä wehemänt
Aber wemä Öpert für inä Vereinsvorstand sötti ha
wot nämä niemert me gliichwit fürä stah
11. A mängem Ort uf derä Wält herrscht Chrieg, äs isch ä Gruus
warum genau? Da chund gläbi niemert ghörig druus
Mä chas nüd verstah äs niid eim schier dr Schnuuf
wemäs tät zämäbindä und durnäs Port apä trölä, chäm dr Schläuer immer obä uf
12. Über Corona weis sicher jedä ä Gschicht z‘verzellä
ja sogar uusrottä hends das cheibä Virus wellä
Aber hüt, äs paar Jahr später
weismä meh und gschribä wordä sind Wiisheitä wiä am Laufmeter
13. Im Ökohof isch äsiä äsonä Asturm, mä cha sich bloss me cherä
Gmeind hed müessä abuä, susch hends nümmä gwüsst wiä wehrä
Äso ä Huufä we immer kauft wird, isch ja das au gar keis Wunder
das au wieder entsorgt wärdid, diä ganzä Bärgä vo dem Plunder
14. Adr Bisistalerstrass tued mä nüi Leitigä verleggä
und drabspränggä dases breiter wird, a paarnä Eggä
Das äs nüd z‘viel Behinderigä gid, wotmä das machä i verschidänä Stückä
hoffentli machts ä Firma wos meh als adr Pragelstrass tued rückä
15. Üses Schuelhus isch gsaniert wordä für mängi Million vo Frankä
das isch a allnä wo Stürä zahlid z‘verdankä
Diä Naftalinwärt sind chäch z‘höch, mä merkis wemä idä Zimmer tägi sitzä
drum muesmä etz halt no eisch alli Bödä usä spitzä
16. I üsärä Nachbargmeind vorä obä am Sunnähang
sinds am planä und Gäld sammlä scho mängs Jahr lang
Buä wetids nüü, iräs Dänkmalgschützdi Sigristenhuus
im taktvoll fäschtä, da chömid d’Villgauer eifach druus
17. Üsi Gegäli gönd etz uf Schwyz usä, das isch praktisch
sit diä nüü Aaraleitig in Betrieb isch
Äso müend mier adr Reinigungstechnick nümmä hindänachä hinkä
drfür tueds etz z‘Ibach ussä chäch i d`Hüser ufä stinkä
18. Batäriifahrzüg sind au voll im Ufschwung
Fahrä tüänd afig all, öb Alt oder Jung
Entsorgä tuäd mä dä diä eisch scho am ghörägä Ort
Öppä i dr Drittwält hindä bimä Buur, aber ohni Wort
19. Z‘Alp gah isch au bi üs ä lebändegi Tradition
gmacht wird’s mit viel Härzblued und Freud, nüd nur wägem Lohn
Dr Alpsummer isch etz nüü uf d`Lischtä cho
als immateriells Kulturebe vodr Unesco
20. Dr Alpchäsmärcht tued scho sid mängem Jahr tuusigi Psuecher aalockä
vili chömid jedäs Jahr, chaufid Chäs und tüend bi lüpfiger Musig idä Fäschtwirtschaftä hockä
Das Jahr heds dä ganz äs psunders Highlight gäh
dr Chäsmärcht hed ä Anerkännigspriis vodr Albert Köchlin Stiftig chönnä entgägänäh
21. Mid juuzä und urchig schönä Kläng
bringsch mängä Muotitaler äso ghörig i d‘Gäng
Bi mängem Alass wird zum beschtä gä, der kulturelli Schatz
meischtens isch dä vollä, bis schier ufä letschtä Platz
22. Zum Abschied gebürt a allnä Gescht und Hälfer ä grossä Dank
hends no gmüetlich bi üs bi Spies und Trank
Diä schöni Stimmig tued üsi Muotitalerhärzä teuf berüerä
mier freuid üs scho, dasmer dä wieder ä Sännächilbi chönid duräfüerä
