1.
Ä Sännächilbi, wiä hiä im Tal
freut üs bsunders, jedesmal
drum tüänd miär all rächt härzlich begrüässä
diä wo gärä cho sind, und diä wo hend müässä
2.
Der Vortrag, wo sich Zuästupf nännt
hed mä immer scho a dr Sännächilbi kännt
und über üsi Thema, vo vorä bis hindä
söll jedä sälber äs Urteil gfindä
3.
Üsi Oberallmig hed gfiiret 900 Jahr
im Turä obä hed mä gfäschtet wunderbar
under dä Korperationä zellt sie zu dä Altä
trotzdem, miär sind üs einig, miär wend si b'haltä
4.
D' Agrarpolitik isch ä Duurbränner i üsem Land
und viel wird gred't, und verlauft wieder im Sand
aber Gwinner sind nüd diä, wo d'Natur tüänd erhaltä
me hed z'Gfühl, ehnder disi, wo d'Sach tüänd verwaltä
5.
A dä Priisä wird gfiälät, bi dä landwirschaftlichä Produkt
äs isch mängä hinderem Briäföffner scho zämä-zuckt

türer wird Milch und Fleisch, all Jahr libärämänt

aber nur wenig vo dem, bliibt am Produzent

6.

Au dr Atom-Uusstieg isch äs Thema bi Frau und Maa
aber glich weiss niämer ä so rächt, wiä das söll gah

aber villicht chönnt mä dr Strommärcht wieder füllä

wänn all d'Liirä wieder vo Hand tätid trüllä

7.

Wänn einä uf Alpstrassä tüäg umäfahrä

sig är ä Verbrächer, hets nu gheissä vor Jahrä

zum Glück isch mä da hüt äs bitzäli milder

äs hed ja zäntumä scho gnuäg vo denä Schilder

8.

Z'redä hed nu gäh, ä langi Chettänä us Holz

ufä Iitrag is Guinness-Buäch isch dr Bsitzer sicher stolz

mit dem Wärch hed är dr Wältrekord g'schlagä

und är macht wiiter, bis mä cha dr Bödmärä-Wald iihagä

9.

Durä Gotthard sött's gä, ä zweiti Röhrä

di eintä wend-si, und disi tuäts störä

viellicht brucht-mä si, wänn nüd hüt, dä moorä

aber gwüssig nüd wäg usnä Traktorä

10.

Äs wiiters Loch sötts nu gäh, entlang am Urnersee

ä Milliardä chönnts choschtä, oder nu meh

öbses bruucht oder nüüd, me isch sich nüd einig

au hiä darf jedä ha, si eigäni Meinig

11.

Üsä Alpchäsmärcht isch afig ä ghörägä Ränner

da träffet sich all, vom Läiä bis zum Känner

au Qualität vom Chäs hed bestandä dr grossi Test

a dr Olma isch är glandet, grad drümal ufem Podest

12.
Wäg dr Fillgauer-Strass hed Wald müässä z'bodä
aber dr Eigätümer hed si nüd chönnä rodä
äs isch OAK-Wald, aber z'Forstamt hed wellä
das det ä andära z'Holz chund gu fellä
13.
Si hends au nüd immer lustig, diä Sännä
d's Problem isch nüd z'Wätter, das tüänds kännä
d'Alpkontrollä, diä gnaget-nä ä chli am Späck
gli luägt-mä nu under jedä Fleugädräck
14.
Luchs und Wolf gänd au viel z'redä
äs Rezäpt dr'gägä weiss schiär ä jedä
miär hend halt Weid und Alpä, nüd Plätz für Golf
det chämer zwar nümmä, dr Luchs und dr Wolf
15.
Modärni Technik hed hüt jedä im Huus
viel gahd automatisch, und all chömid druus
gli wird's unheimlich, we im Film vom Harry Potter
im 1. Gadä im Tal, stahd bereits ä Mälchroboter
16.
Bi soviel Technik juckt's mich im Gsäss
und ich findes nümmä ganz ziitgemäss
wänn ich gseh, wiä mä mängisch nooch a dr Strass

nu Tristä anästellt, und gnau nach Mass

17.

D'Stoosbahn but-mä, amä muätigä Ort
det gahts ufä, graad dur's Bort

choschtä tuät das äs heidä Gäld

dr' für fahrt mä gäch obsi, wiä susch niänä uf dr Wält

18.
Äs git wieder ä nüüi Deponie i dr Lustnau vorä

äs duuri nur ä paar Jahr, und z'Land sig nüd verloorä

zum gschauä isch dr Underschied ja ä chlinä
öb jetzt ä Deponie, oder vorhär ä Gadä-Ruinä
19.

Usämä ghudlätä Huus, vo altä Ziitä
hedr gseh, dr Niderist, beedi Mythä
abzerrt und wieder ufgstellt, Chöschtä hed mä gha
gschauä chamäs, aber me darf nümmä drinä-stah
20.

D'Muätitaler müänd jetzt ohni Tunnäl dur-uusä
aber d'Strass ussä-umä chund glaubi au ghörig uusä
äs Tunnäl sig z'tüür, ufs Gäld müäss-mä luägä
aber ussä-umä muäss mä gwüssig meh gu pfluägä
21.

Ä millionä-schwäri Fiir am Morgartä sig doch Schmarrä
und bsunders grad hüt, wo dr Kanton wieder sött sparä
d'Verantwortig muäss aber kei Partii übernäh
d'Schuld cha mä dasmal a dä Habsburger gä
22.

Z'verzellä gäbs nu ä huufä Gschichtä
aber miär wend ja üch au nu ä chli la brichtä
miär wüschid a allnä, vo nah und wiit
viel Gsundheit und ä guäti Ziit